قهوة مُرة للكاتبة نرمين عادل همام وراء كل باب حكاية يمكن تصدقها ويمكن تكذبها لكنها حصلت فعلا
رفعت راسي بسرعة وقولتلها برعب، يحل الموضوع؟! يعني إيه يحل الموضوع؟
انهارت في العياط وهزت راسها وقالت، والله العظيم خفت منه يا سلمى، الرعب دخل قلبي ومبقتش فاهمة هو ناوي على إيه ولا ممكن يعمل إيه فينا.
الكاتبة نرمين عادل همام
طلعت موبايلها بسرعة وإيديها بتترعش، وفتحت تسجيل صوتي قصير. وفجأة طلع صوت عمر… صوته كان بارد وهادي بطريقة ترعب، كأنه بيتكلم عن حاجة ملهاش أي قيمة، كان بيقول، يا إما تختفي أنتي والزفت ده من وشي بهدوء ومن سكات، يا إما وربنا لأخليكي تندمي على اليوم اللي شفتي فيه وشي.
قشعريرة بردت جسمي كله من نبرة صوته اللي أول مرة أسمعها، ده مش جوزي اللي أعرفه. ياسمين كملت كلامها قبل ما ألحق أنطق، كان بيهددني ليل ونهار إنه هياخد آدم مني ويحرق قلبي عليه… وإنه يقدر يمحيني من على وش الأرض ومن حياته كأني مكنتش موجودة أصلا.
بصت لابنها بانهيار تام وهمست بوجع، أنا الليلة دي بس فهمت واستوعبت… إن الراجل اللي قدر يعمل فيكي كده ويخدعك السنين دي كلها، قادر يعمل فينا أي حاجة وأكتر من كده بكتير ومفيش حاجة هتردعه.
رفعت عينيها وبصتلي أخيرًا وقالتلي، عشان كده أنا جيتلك لحد هنا… لأني عرفت واتأكدت إني لو فضلت ساكتة، مش هيدمرك أنتي لوحدك… ده هيدفعنا كلنا التمن وهيدمرنا كلنا من غير ما يرفله جفن.
مسكت موبايلها تاني ببطء شديد، وفتحت تسجيل تاني. صوت عمر ملى الأوضة المرة دي، كان واضح جدا وهادي بطريقة تخوف أكتر من الأول، وهو بيقول، سلمى بقت سهلة أوي دلوقتي… وفي أضعف حالاتها، هي بس محتاجة زقة أخيرة وهتنهار وتقع لوحدها من غير أي مجهود مني.
اتجمدت في مكاني كأن حد كب عليا مايه متلجة. عقلي وقف عن التفكير، وصوته كمل التسجيل، كل حاجة جاهزة ومترتبة… الرسايل اللي هتجننها، الصور المتفبركة، التقارير المضروبة… وحتى الأدوية اللي بتتاخد باسمها عشان نثبت إنها مجنونة.
رفعت عيني وبصيت لياسمين بصدمة حقيقية وشلل تام في التفكير. بصتلي وهي بتعيط بحرقة وقالت،
كان بيخطط يلبسك مصيبة.
الكلام وقف في زوري، مقدرتش أنطق. كملت هي بسرعة كأنها خايفة لو سكتت تفقد شجاعتها وترجع في كلامها، كان بيصورك وأنتي بتعيطي… وبيسجل لحظات انهيارك بعد كل خناقة بينكم… ومحتفظ بكل رسايلك اللي بتبعتيها وقت غضبك… وبعدين بيقصقص الفيديوهات ويمنتجها عشان تطلعي مجنونة ومختلة نفسيًا.
