كنت عند ماما بروح أطمن1

كنت عند ماما بروح أطمن عليها وأقعد معاها شوية، والولاد كانوا جعانين، فقولتلها: "يا ماما الولاد جعانين". قالتلي: "عندك الجبنة، قومي اعملي لهم". بعد شوية أختي جت هي وجوزها، ومكملتش حتى نص ساعة، لقيتها بتقول لهم: "تتغدوا؟" فسكتوا شوية، فقالت لأختي: "أنا عاملة صينية ورق لحمة في الفرن، طلعيها واغرفي الرز وكلوا". ساعتها زعلت جوايا، مش عشان الأكل نفسه، لكن عشان حسيت بالفرق في المعاملة. أنا اللي دايمًا بخدم ماما وبراعيها، ولما ولادي كانوا جعانين حسيت إنها استخسرت فيهم الأكل، مع إن الأكل موجود. والله ما قعدت كتير، يمكن ربع ساعة، واستأذنت ومشيت وأنا مقهورة، مش من الغدا، لكن من إحساس التفرقة والظلم اللي وجعني. وأنا ماشية، ولادي كانوا بيسألوني: "يا ماما هنروح فين؟" حاولت أتكلم معاهم عادي وأغيّر الموضوع، لكن صوتي كان مخنوق. كنت حاسة إن الغصة اللي في قلبي أكبر من إني أشرحها لأي حد. مشكلتي ما كانتش في طبق رز ولا حتة لحمة، مشكلتي كانت إني لأول مرة أحس إن ولادي أقل من غيرهم وهم قاعدين في بيت جدتهم. طول الطريق وأنا بافتكر مواقف قديمة كنت دايمًا بعديها وأقول: "أكيد ماما ما تقصدش". مرة كانت تشتري هدايا لأولاد أختي وتقول لأولادي: "أبقى أجيب لكم بعدين". ومرة تعمل أكلة عارفة إن ولادي بيحبوها وتستنى لما نمشي عشان تطلعها. كنت كل مرة ألتمس لها العذر، وألوم نفسي وأقول يمكن أنا اللي مكبرة المواضيع. لكن موقف النهارده كسر كل الأعذار اللي كنت ببنيها جوايا. لأن الفرق كان واضح قدام عيني، ومحدش يقدر ينكره. وصلت البيت، وعملت للولاد أكل بسرعة، وقعدت أبص لهم وهم بيأكلوا. كانوا فرحانين بأي حاجة، وأنا كنت بحاول أخبي دموعي عنهم. قلت في نفسي: "يمكن الأفضل إني أقلل زياراتي، طالما كل مرة برجع مكسورة". فضلت طول اليوم ساكتة، لا كلمت ماما ولا حتى أختي. كنت مستنية حد يحس، حد يتصل يقول لي: "إنتي زعلتي؟" لكن اليوم خلص من غير ما حد يسأل. تاني يوم الصبح، وأنا بشرب القهوة، لقيت موبايلي بيرن. كانت أختي. استغربت جدًا إنها هي اللي بتتصل، لأننا مش بنتكلم كتير في التليفون. رديت عليها، ولأول مرة سمعت في صوتها تردد وكأنها مش عارفة تبدأ منين. وبعد ثواني من الصمت قالتلي: "أنا لازم أحكيلك الحقيقة... لأن اللي حصل امبارح ماكانش صدفة، وفي سبب خلى ماما تتصرف معاكي بالطريقة دي." الجملة دي خلتني أتجمد مكاني... لأن اللي عرفته بعدها غيّر نظرتي لكل المواقف اللي فاتت، واكتشفت إن الموضوع كان أكبر بكتير من مجرد غدا اتقدم لناس واتمنع عن ناس.... يتبع تسمّرت مكاني والأيد اللي كانت ماسكة فنجان الققهوة بدأت تترعش. الفنجان نفسه كان بيهتز في إيدي، وصوت أختي على الناحية التانية من الخط كان طالع ببطء شديد، كل كلمة طالعة بحساب وكأنها بتفكر ألف مرة قبل ما تنطقها. "حقيقة إيه يا هيام؟" سألتها بصوت مكنش طالع بسهولة، صوت مجروح ومكتوم زي ما هو من امبارح. "حقيقة إيه اللي تخلي أمي تستخسر اللقمة في عيالي، وتتعامل معايا كإني غريبة في بيتها؟" سكتت هيام لحظات، وسمعت صوت نفسها الطويل المحمل بالهم، وبعدين قالت: "يا هدى، امبارح بعد ما إنتي مشيتي، أنا وجوزي كنا قاعدين، وماما كانت بتتكلم على الوش، لكن عينها كانت على الباب. أول ما إنتي قفلتي الباب ومشينا، ماما قعدت على كرسي السفيرة ودموعها نزلت من غير صوت. أنا استغربت، وسألتها في إيه، هي إنتي زعلتي هدى؟ ساعتها ماما انهارت، وقالتلي الجملة اللي هتقلب كل حاجة جواكي زي ما قلبتها جوايا..." اتنفست بصعوبة وقولتلها: "قالتلك إيه يا هيام؟ انجزي، أنا من امبارح وناري جيدة." قالت هيام بصوت واطي ومتردد: "ماما قالتلي إنها مكنتش عايزة تحط الأكل قدام عيالك، مش عشان تستخسر فيهم... لا يا هدى، عشان الأكل ده كان معمول بفلوس طارق جوزي، طارق هو اللي جاب اللحمة والطلبات، وماما كانت محفورة في موقف زبالة مكنتش قادرة تقولك عليه." قاطعتها بسرعة والغضب بيزيد جوايا: "وطارق جوزك يجيب أكل لأمي ليه؟ وأمي ترفض تأكل عيالي من أكل في بيتها ليه؟ هي بقت بتتحكم في البيت اللي كبرنا فيه على حساب عيالي؟!" "اصبري يا هدى ومتقاطعيش!" هيام نبرة صوتها اتغيرت وبقت أشد، وكأنها بتدافع عن سر كبير. "إنتي ما تعرفيش حاجة خالص عن اللي بيحصل في بيت ماما بقاله أكتر من ست شهور. إنتي دايمًا بتيجي تخدمي وتساعدي وتجري، بس عمرك ما قعدتي وسألتي ماما: هي مصاريف البيت ده ماشية إزاي؟ إنتي فاكرة إن معاش بابا الله يرحمه لسه بيكفي؟ المعاش اتوقف جزء كبير منه بسبب مشاكل في الأوراق من ست شهور، وماما مكنتش بتقول لحد، وكانت بتستلف من طارق جوزي عشان تدفع كهربا ومية وتجيب العلاج اللي بتمشي عليه." الكلام كان بينزل عليا زي المية الساقعة في عز التلج. بقيت باصة للفراغ ومش قادرة أستوعب. كملت هيام بصوت أهدى: "طارق جوزي، لما عرف بموضوع المعاش، اتفق مع ماما إنه هيتكفل بمصاريف البيت والأكل والشرب، بس بشرط... شرط هو اللي فرضه عليها بحجة إنه بيساعدها، لكنه في الحقيقة كان بيتحكم في البيت. طارق قال لماما بالحرف: 'أنا بكفي البيت ده عشانك يا حماتي، مش عشان عزومات وموايد لمين وما يروحش'. طارق انسان حساس ومادي جداً، وكل مرة كان بيشوفك إنتي وعيالك بتتغدوا هناك، كان بيعمل مشكلة معايا بالليل ويقولي: 'أنا مش فاتح سبِيل لعيال أختك، أنا ببعث الأكل ليكِ ولأمك بس'." حسيت بغصة في حلقي أشد من غصة امبارح. مسكت التليفون بكل قوتي وقولت: "وماما تسمح له يتكلم كده؟ وماما ترضى إن جوزك يتحكم في اللقمة اللي تدخل بطن عيالي؟!" ردت هيام بكسرة: "ماما كانت مكسورة العين يا هدى! طارق هو اللي بيدفع ثمن حقن الظهر اللي ماما بتاخدها كل شهر، الحقنة الواحدة برقم وقدره، ومن غيرها ماما ما بتقدرش تقف على رجلها. امبارح لما إنتي جيتي، ماما مكنش حيلتها في البيت غير حتة الجبنة والعيش، والأكل اللي كان في الفرن... صينية ورق اللحمة... طارق هو اللي جايبها معاه وهو جاي في الطريق، وكان قايل لماما في التليفون قبل ما يوصل بنص ساعة: 'أنا جايب غدايا أنا وهيام معاكِ، يا ريت محدش يأكل منه غيرنا'." سكتت هيام، وأنا فضلت ساكتة. كل موقف قديم مر في خيالي زي الشريط. الهدايا اللي كانت بتجيبها لأولاد هيام... مكنتش ماما اللي بتشتريها، ده طارق كان بيجيبها لعياله وماما بتسلمها لهم قدامي عشان ما تكسرش بخاطر هيام. الأكلة اللي كانت بتعملها وتستنى لما نمشي عشان تطلعها... كانت أكل بيجيبه طارق وبيشرط عليها ما تطلعوش غير لما يكون هو موجود! كنت فاكرة إن أمي بتفاضل بين عيالي وعيال أختي، اتاري أمي كانت عاجزة، ومكسورة، ومقيدة بشروط راجل مادي دخل بيتنا بفلوسه واستغل حاجة ست كبيرة ومريضة! دموعي نزلت، بس المرة دي مش من الوجع على نفسي ولا على عيالي... المرة دي من القهر على أمي. الست اللي ربتنا وعمرها ما حرمتنا من حاجة، بقت قاعدة في بيتها خايفة تطعم أحفادها لقمة عشان صاحب الفلوس ما يحاسبهاش! "وليه ما حكيتيش يا هيام؟" سألتها بصوت مرتعش. "ليه سيبتوني أفهم غلط؟ ليه سيبتيني أمشي امبارح وأنا حاسة إني كارهة الدنيا ومكسورة قدام عيالي؟" تنهدت هيام وقالت: "ماما هي اللي حنّفت عليا ما أقولكيش. كانت بتقولي: 'هدى ظروف جوزها على قده، لو عرفت إن المعاش واقف وإن طارق هو اللي يصرف، هتزنق نفسها وتبيع اللي حيلتها عشان تساعدني، وأنا مش عوزاها تشيل همي ولا تحس إنها مقصرة'. ماما كانت بتحميكي يا هدى! كانت بتاكل في نفسها وتحتمل الإهانة ونظرات قسوتك ليها امبارح، عشان ما تحملكيش عبء مالي إنتي مش قدّه." قفلت السكة مع هيام وأنا مش قادرة أقف على رجلي. قعدت على الصالون، وبصيت لصالة شقتي البسيطة. افتكرت جوزي اللي بيطلع من الصبح للمغرب عشان يكفي مصاريفنا بالعافية، وافتكرت نفسي وأنا دايمًا رايحة لأمي بإيد فاضية أو بحاجة بسيطة على قدنا، وبخدمها بنظافة البيت والمطبخ، وفاكرة إني كده شايلها... في حين إن أختي وجوزها كانوا شايلين الماديات ومكتفين بعصر أمي وتحجيمها. الموقف اتعكس تماماً. امبارح كنت حاسة بالظلم، والنهارده حاسة بالذنب. الذنب إني شكيت في قلب أمي، والذنب إني ما لاحظتش كسرة عينها وهي بتقولي "قومي اعملي لهم جبنة"، الذنب إني ما لمحتش الخوف في عينها وهي باصة للباب مستنية طارق يدخل بفرضه وشرطه. قمت وقفلت القهوة اللي تبرد. الولاد كانوا بيلعبوا في الصالة، يبصوا لي ويضحكوا من غير ما يفهموا حاجة من نار امبارح ولا سر النهارده. قربت منهم وحضنتهم بقوة، وكأني بعتذر لهم في سري، وبعتذر لأمي اللي ظلمتها. بس المشكلة مكنتش بس في معرفة الحقيقة... المشكلة كانت في اللي لازم يتعمل بعد كده. هل أسكت وأسيب أمي رهينة لفلوس طارق وتحكماته؟ هل أطنش وأمثل إني ما عرفتش حاجة وأفضل أزورها وأنا متجاهلة إن عيالي ممنوعين من أكل البيت؟ ولا أواجه؟ ولو واجهت... هجيب منين الفلوس اللي تدفع حقن ظهرها ومصاريف البيت اللي المعاش مش بيغطيها؟ لبست طرحتي بسرعة، وجمعت كل غوايش الدهب البسيطة اللي كنت شايلاها للزمن في علبتها الصغيرة. بصيت للمراية وقولت لنفسي: "أمي كبرتنا بعز، ومش هسمح لراجل غريب يكسر عينها في أواخر أيامها ولا يخيّرها بين أحفادها." فتحت باب الشقة ونزلت، وأنا نايكة طريق بيت ماما، ومش في دماغي غير سؤال واحد: يا ترى لما أفتح الباب وأشوفها قاعد في كسرتها، هبدأ الكلام إزاي؟ وكيف هرد لأمي كرامتها اللي اتداست تحت رجيل الفلوس؟

مقالات ذات صلة

مراتي ورثت حكايات امانى 3

رجعت لبناتي بعد سنة… فاكتشفت الصدمة

ظنّ أنه فاز بكل شيء في زفافه… ولم يكن يعلم ما كتبته أمي قبل مۏتها

سر الطيبة المدفونة حكايات مني السيد ج 2

في قعدة توزيع الميراث

طلبات الصداقه

اترك تعليقاً إلغاء الرد