مراتي ورثت حكايات امانى 2
سابوا أمهم الواقفة على رجل واحدة وسابوني أنا اللي كنت فاكر إنهم سندي، ومشيوا يجروا خطاويهم كأننا وباء خايفين يتعدوا منه.
بقيت أنا وأمي بس.. واقفين وسط كراتين وشنط هدوم متبهدلة في نص الشارع. الشمس كانت بتغرب، والنور بانسحب من الدنيا زي ما الأمل انسحب من قلبي.
أمي قعدت على الأرض تبكي وتندب حظها، وأنا مسكت الشنطة اللي مراتي رمتها لي عند البواب، وسحبتها بإيد مهدودة. رجلي كانت تقيلة كأنها مربوطة بسلاسل حديد، وأنا ماشي في اتجاه قسم الشرطة عشان أسلم نفسي، لأن الهرب مش هيفيد، ومفيش مكان أستخبى فيه ولا قرش في جيبي أدفع بيه أجرة تاكسي.
طول الطريق وأنا ماشي على رجلي، شريط حياتي كان بيمر قدام عيني. افتكرت لما كانت بتمسح وتطبخ وتخدم، وأنا بقعد بكل برود أراقبها وأتمنى كسرتها. افتكرت لما كانت بتقولي “القرشين دول شايلهم للزمن”، وأنا أرد بقسوة. اكتشفت إنها كانت أذكى مني بألف مرة، ردتلي الصاع صاعين، وأخدت حقها وتارها، وسابتني لا طالت عروسة جديدة، ولا حافظت على بيتي، ولا حتى ملكت حريتي.
وصلت باب القسم، الوقفة قدام اللوحة الرخام السوداء كانت بتموتني في اليوم ألف مرة. أخدت نفس عميق ودخلت، وسلمت نفسي للأمين اللي على الباب.
وبعد ساعات من التحقيق، انقفل الباب الصاج المصدّي عليا وعلى المساجين، ولقيت نفسي قاعد في زاوية ضيقة على الأرض الباردة، وسط ريحة المكان والظلمة.
قعدت أحضن رجلي لصدري وأبكي بحرقة.. دموع ندم ملهوش أي قيمة دلوقتي. وفي وسط الظلمة دي، سمعت صوت العسكري ينادي من وراء القضبان بصوت عالي: “المتهم فلان.. اطلع، في زيارة مستنياك برة!”
رفعت رأسي بذهول.. مين ممكن يجيلي في وقت زي ده؟ أمي اللي حيلتها مكسورة؟ ولا المحامي؟ ولا في صدمة جديدة مستناني برة؟
قمت من على الأرض الباردة بالعافية، رجليا كانت بتخبط في بعضها. مشيت ورا العسكري وأنا عقلي بينبض بالأسئلة.. مين اللي ممكن يفتكرني أو يجيلي في القاع ده؟
طلعت لغرفة الزيارات الضيقة. وقفت ورا السلك المشبك الضيق، ولما عيني وقعت على اللي واقفة الناحية الثانية، حسيت بضربة في قلبي طيرت النفس من صدري.
كانت هي.. مراتي!
كانت واقفة بكل أناقتها، لابسة أسود، حاطة إيد في جيب جاكيتتها، وإيدها الثانية ماسكة نظارتها. ملامحها كانت هادية جداً، مفيش فيها أي أثر للغضب ولا حتى الانتقام.. كان في عيونها شيء أصعب بكثير: نظرة “لا مبالاة”. نظرة كأنها بتبص لشيء ملوش أي قيمة ولا يعنيلها أي حاجة في الدنيا.
