خيبة ابن أمه ج 2 حكـايات مني السيد حصري

الست دي كانت متكبرة ومفترية. فايزة حاولت تقف في الشارع تنوح وتعمل ڤضيحة وتقول طردتني من بيت ابني، بس الجيران نفسهم ردو عليها بيت ابنك إيه يا حاجة؟! ده خير أسماء مغرقكم من ساسكم لراسكم، ده انتِ كنتِ بتنزلي تتبغددي علينا بحاجة الست اللي كانت شقيانة فيها.. اتقي الله بقى وروحي شوفي لقمة عيشكم منين!
فايزة شالت الشيل ونزلت تجرجر أذيال الخيبة وراها، راجعة لحارتها القديمة وشقتها الضيقة اللي كانت هربانة منها.
ومحمد؟ قضى الأربعة أيام في حجز القسم، وطلع على جلسة التجديد، القاضي جددله خمسة عشر يوماً حبس احتياطي. شغله في شركة الصيانة عرف بالمحضر والتحقيق، فتم وقفه عن العمل وتحويله للشؤون القانونية مع وقف صرف راتبه لحين الفصل في القضية الجنائية.
سها المحامية مسبتش ثغرة واحدة.. العربية اللي كانت مكتوبة باسمه؟ أسماء رفعت دعوى إثبات ملكية وقدمت كل إيصالات سداد الأقساط اللي كانت بتتسحب من حسابها البنكي شهرياً، مع تحويلات البنك باسم شركة السيارات، وخدت قرار بالحجز التحفظي على العربية لحد ما المحكمة تفصل فيها، ومحمد مبقاش حتى يملك يمشي بيها خطوة واحدة!
أما قضية الطلاق للضرر، فمع وجود التقرير الطبي ومحضر الشرطة والحبس الاحتياطي، كانت شبه محسومة في أول جلستين تلاتة، مع إلزامه بدفع مؤخر الصداق، ونفقة متعة وعدة، وقايمة المنقولات كاملة اللي مكتوبة بجرام الذهب وكل قطعة عفش اشترتها أسماء بفلوسها!
بعد تلات شهور.. المشهد كان مختلف تماماً. أسماء كانت واقفة في جنينة مستشفاها الكبير في يوم مشمس ودافي. كانت لابسة بالطو التمريض الأبيض المكوي على سنكحته، وشها رجع نضر وفيه حياة، الضحكة اللي غابت سنين رجعت تنور ملامحها من تاني. الدكتور فريد والمدير التنفيذي للمستشفى كانوا واقفين في حفلة تكريم صغيرة، بيسلموها درع التميز بعد ما تم ترقيتها رسمياً ل مديرة قطاع التمريض على مستوى فروع المستشفى كلها.
التصفيق كان مالي القاعة، وزمايلها كلهم كانوا بيهنوها بحب حقيقي واحترام، لأنهم عارفين هي مين، وعارفين شقاها وتعبها.
في نفس اليوم، سها رنت عليها على الموبايل، وصوتها كله فرحة وزغاريد مبروك يا دكتورة أسماء! حكم الطلاق للضرر نزل رسمي ونهائي وبات، وحكمت المحكمة بإلزام المدعى عليه بمؤخر الصداق ومصاريف الدعوى، وقرار تمكينك النهائي من الشقة اتوثق في الشهر العقاري!
أسماء اتنفست نفس عميق، حست كأن رئتها بتتملي بهوا نضيف لأول مرة من ست سنين والولد ده أخباره إيه يا سها؟ سها ضحكت بسخرية ابن فايزة؟ خرج من الحبس بعد ما قضى شهرين على ذمة القضية واتحكم عليه بسنة مع إيقاف التنفيذ عشان أول سابقة، بس اتفصل من شغله بسبب الڤضيحة وحكم المحكمة! وقاعد دلوقتي في شقة أمه القديمة في ضهر الحارة، هو وأمه بياكلوا فول وطعمية بجد، وبيدور على أي شغلانة باليومية ومحدش راضي يشغله بعد ما سمعته باظت! وكمان جه لمكتبي امبارح يبوس إيدي عشان نتنازل عن قايمة العفش والمؤخر وميتحبسش بيهم! أسماء سكتت ثانية، وبعدين ابتسمت وقالت بهدوء قولي له.. الناس كلها عايشة كده ومحدش بېموت من الجوع، مش دي كانت كلمته وكلمة أمه؟ يشبع بقى بكلام أمه وبالبركة، وحقي بالقانون هيتاخد مليم مليم، عشان يعرف إن الست اللي بتشيل بيت على كتافها، قادرة تكسر ضهر اللي يقل بأصلها ويمد إيده على كرامتها.
قفلت التليفون، حطته في جيب البالطو، ورفعت راسها للسما وهي شامة ريحة الشمس والهوا، ومسكت ورق الترقية الجديد بإيدها القوية، ومشيت بخطوات ثابتة وواثقة وسط ممر المستشفى، وهي عارفة إن البدايات
الجديدة مش بتيجي غير لما نقطع بإيدينا كل حبل كان رابطنا بالرخص والمهانة. النهاية