حكايات بسمه 3
شيرين صرخت من وراه بانهيار:
— حسبي الله ونعم الوكيل فيكي! دمرتي بيتنا وحبستينا عشان شوية فلوس!
المحامي بتاعي اتدخل بصوت صارم هز الممر:
— الفلوس دي شقا عمرها اللي أنتم سرقتوه بالتزوير والنصب! ولو مش خايفين على شرفكم وتاريخكم، خافوا من العقوبة اللي مستنياكم، لأن وكيل النيابة أصدر قرار حاليًا.
وكيل النيابة خرج من الأوضة، وبص للكاتب وقال بصوت نفي فيه أي مجال للنقاش:
— يُحبس المتهم حسين، والمتهمة شيرين، أربعة أيام على ذمة التحقيق، مع مراعاة تجديد الحبس في الميعاد، وإرسال حرز الهواتف والمستندات للطب الشرعي وفحص التوقيعات، وتكليف المباحث بضبط وإحضار المدعو “أبو العز” والتحفظ على كافة أصول الشركة المشبوهة.
الكلمات نزلت على أمهم زي الصاعقة. صرخت وسقطت على الأرض مغمى عليها، والعساكر بدأوا يسحبوا حسين وشيرين ناحية حجز النيابة تحت صراخهم وتوسلاتهم اللي كانت بتتردد في الممر الفاضي.
حسين وهو بيتسحب، بصلي بكسرة ونظرة ترجي أخير:
— سامحيني يا هنا… سامحيني!
ما رديتش. قفلت شنطتي، وبصيت للمحامي وقلت:
— يلّا بينا يا أستاذ. أنا عايزة أروح.
طلعت من مبنى النيابة، وكانت ريحة هواء الفجر نادرة وباردة. حسيت بتقل كبير انشال من على صدري، لكن في نفس الوقت حسيت بحجم الخديعة اللي عشتها. الشخص اللي ائتقنته على حياتي وشاركت معاه سقف واحد كان مستعد يبيعني ويبيع أمانتي عشان يرضي طمعه وطمع أهله.
تاني يوم الصبح، النيابة تحفظت رسمياً على عربية أخته والمبالغ الكاش اللي كانت معاهم في الكمين كجزء من رد المستحقات. والمحامي بدأ إجراءات دعوى الطلاق للضرر مرفقاً بيها أحكام الحبس والتحقيقات الرسمية، بالإضافة لإقامة دعوى استرداد كافة المبالغ المالية المسروقة.
بعد يومين، جالي اتصال من المحامي بلغني فيه إن المباحث وضعت إيدها على مقر شركة “أبو العز”، ولقوا إن حسين مكانش الضحية الوحيدة، لكنه كان العقل اللي تورط معاهم بكامل إرادته وقدم تسهيلات وتوقيعات مزورة باسمي عشان يدخل شريك أساسي.
وقفت في بلكونة شقتي، الشقة اللي حاول حسين يسرق استقراري فيها. بصلت للشارع الهادي وابتسمت ابتسامة خفيفة، ابتسامة حد خسر تجربة بس كسب نفسه وكرامته وحريته للأبد.
