حكايات اسما ٣
— أنتِ فين دلوقتي؟ — سألتها بتركيز.
— أنا في طريق السويسي راجعة القاهرة. ندى… أنا مستعدة أجي معاكي للنيابة وأسلم أصل الورق ده بنفسي وأشهد ضد حسام وكريم، بس بشرط واحد!
— شرط إيه؟
— إنك تتنازلي عن البلاغ اللي ضد شركة التوريدات في الجزء الخاص بيا، وتضمنيلي إن حسام ما يرفعش عليا قضية سرقة أوراق أو يضرني! أنا اكتشفت إنه كان كاتب شقة جوازنا باسم أخته ومفهمني إنها ملكنا، يعني أنا كمان طلعت بالخروج من الجوزة دي على بياض!
ابتسمت بذكاء. المشهد كان بيتفكك قدا مي، والتحالف الخبيث بين حسام وكريم وسمر انفرط لقطع صغيرة وكل واحد فيهم مستعد يبيع التاني عشان ينجو بجلده.
قلتلها بثبات:
— الأوراق الأصلية تتسلم بكره الصبح الساعة 9 في مكتب المحامي مجدي في القاهرة. لو الورق أصل وسليم، المحامي هيضمن حمايتك القانونية كـ «شاهدة إثبات» مش متهمة.
قفلت مع سمر، وبدأت أجهز شنطتي. ما كانش فيه وقت للنوم.
نزلت من الفندق في حراسة أمن الفندق لحد التاكسي الخاص اللي طلبهولي المحامي، وطلعت على القاهرة فورًا.
وصلت مكتب الأستاذ مجدي في القاهرة الساعة 8:30 الصبح.
وبعد نص ساعة، دخلت سمر وهي شايلة شنطة كبيرة، وشكلها مجهد وعينيها ورمت من العياط. حطت الملفات الأصلية على الترابيزة.
المحامي مسك الملفات وبدأ يفحصها بنظاراته. الأختام الحية، عقود البيع الابتدائية والنهائية لأرض المقطم، إيصالات الأمانة المزوّرة باسم بابا الله يرحمه، ودفاتر التحويلات المالية السرية.
المحامي رفع راسه وبصلي وقال:
— القضية دي كملت تمامًا يا ندى. الورق ده أصل وسليم 100%. التزوير واضع والنصب مكتمل الأركان. إحنا مش بس هنرجعلك حقك في أرباح أرض المقطم اللي اتأذى فيها والدك، إحنا هنحفظ على كل أملاك حسام وكريم للتعويض.
وفجأة… تليفون المحامي رن.
كان التليفون من وكيل النيابة المباشر للبلاغ الأول.
المحامي رد، وبعد ثواني ملامح وشه اتغيرت تمامًا وظهر عليها الذهول!
بصلي المحامي وقال بصوت منخفض:
— ندى… كريم وحسام اتقبض عليهم في كمين طريق السخنة وهم راجعين القاهرة من ساعة!
سألته بسرعة:
— اتقبض عليهم بسبب البلاغ بتاعنا؟
المحامي هز راسه بالرفض وقال:
— لأ… اتلاقوا في عربية حسام مبالغ مالية ضخمة بالعملة الصعبة ومستندات مهربة من شركته! بس المشكلة مش هنا يا ندى… المشكلة إن كريم وهو بيتحقق معاه في الكمين، رمى التهمة كلها عليكي أنتِ! وقال للشرطة إن الحسابات والأموال دي كلها ملك مراته «ندى» وإنك أنتِ المحاسبة المسؤولة عن كل المعاملات دي، والشرطة دلوقتي مطلعين أمر ضبط وإحضار ليكي!
