كشـري سلفـتي ج 2 حكـايات مني السيد حصري

لمحة نيوز

مكنتش أعرف إن طبق الكشري هيطلع من مناخيري تهمة حسد، وهيطلعني شحاتة في نظرك ونظر عيالك! إنتِ وقفتي في المنور تقولي للسلفتك التانية إني عيني فارغة وحاسداكي ومستكترة عليكي عيشتك، ولما جيتي تديني العلبة رفضتها بكرامتي، تقومي تبعتي لي تموين في شنطة سودا عشان تكسري نفسي؟
سلفتي اتلجلجت وصرخت أنا كنت بساعدك! كنت فاكراكي محتاجة ومكسوفة تقولي! رديت عليها بسرعة وثقة لا يا حبيبتي، أنا مش محتاجة. أنا بيتي مستور وخيره كتير، ومستورة بفضل ربنا، مش مستنية كيس عدس منك! وإنتِ عارفة كويس أوي إنك مكنتيش بتساعدي، إنتِ كنتي بتعايريني، كنتي عايزة تكسري عيني عشان تفضلي شحاتة المشاعر دي عليا!
حماتي خبطت على رجليها وزعقت بس يا بت! إنتِ هتعملي فيها مظلومة؟ ما إنتِ اللي عينك فارغة من يوم ما دخلتي البيت ده! كل ما واحدة تجيب حاجة تفضلي تبصي لها! وكمان بترمي الحاجة قدامي؟ ده إنتِ لازم تتربي! يا أحمد، لو البت دي مباستش راس سلفتها وراسي دلوقتي، تاخد هدومها وتروح لأهلها، البيت ده ميعيشش فيه قلالات الأصل!
أحمد اتقدم خطوة ووشه متوتر، وبصلي برجاء ممزوج بتهديد يلا يا نادين، كفاية جنان لحد كدة، اخلصي وبوسي راس أمي وخلي الليلة تعدي بدل ما تطربق فوق دماغك!
في اللحظة دي بالذات، جرس الباب رن. رنة طويلة ومستمرة، مش رنة واحدة بتستأذن، دي رنة واحد جاي ومصمم يدخل. أحمد راح فتح الباب وهو متضايق مين على الباب في وقت زي ده؟
فتح الباب، ولقى أخويا الكبير، محمد، ومعاه ابن عمي الكبير. رجالة داخلين بتقلهم، وشوشهم مبتضحكش، وعيونهم باصين لجوة الصالة مباشرة. أحمد اتراجع خطوة لورا واتلخبط أهلاً يا محمد خير، في حاجة؟
محمد مدخلش على طول، وقف على العتبة، وبص لحماتي وحمايا وقال بصوت رجولي رزين السلام عليكم يا حاج. معلش جايين في وقت مش وقتنا، بس أختي رنت عليا وقالت لي ألحقني، وأنا عندي أختي دي خط أحمر مبيتكسرش.
حمايا قام وقف، وحس إن الموضوع خرج عن نطاق خناقات الحريم التافهة وبقى قاعدة رجالة وعليكم السلام يا ابني، اتفضل، اتفضل يا محمد البيت بيتك. إحنا أهل ومفيش بينا الكلام ده.
محمد دخل، عينه جت عليا وأنا واقفة راسي مرفوعة، وشاف الحاجة المرمية على الأرض، وشاف توتر سلفتي وحماتي. مشي لحد عندي، وقف جنبي وحط إيده على كتفي، والحركة دي لوحدها خلت كل الوجع اللي كان في قلبي يتبدد. حسيت إن ضهري متسند بجبل، مش زي الراجل اللي كان واقف جنبهم ومستني يشوفني بتذل.
محمد بص لحمايا وقال بهدوء مخيف خير يا عمي؟ إيه اللي رامي أكياس الأكل في الأرض كدة؟ وإيه الكلام اللي سمعته وإحنا طالعين على السلم؟ أختي هنا بتتهان ليه؟
حماتي حاولت تلم الموضوع بطريقتها وتظهر بمظهر الحكيمة المظلومة والله يا ابني أختك هي اللي طالعة نازلة تنكد علينا، سلفتها عملت أكل فبصت لها في الأكل وراحت تطلب، ولما سلفتها حبت تجاملها وتبعت لها خير بيتها، نزلت رمت الأكل في وشنا وقالت بتعايروني! إحنا عيلة محترمة ومبنقبلش قلة القيمة دي في بيتنا!
محمد ضحك ضحكة قصيرة وساقعة جداً، وبص لأحمد وإنت يا أحمد؟ ده كلام يتقال؟ ده كلام يدخل عقل راجل؟ أختي جوزناها لك وهي بنت ناس، أبوها الله يرحمه كان يشيل الناس كلها، ومربيها على عزة النفس. لما تطلب طبق أكل من سلفتها في بيت واحد، ده اسمه عشم وحسن نية، مش شحاتة ولا حسد! لكن إن مرات أخوك تتكلم في عرض أختي وأمانتها في المنور، وتقول عينيها وحشة وبيتي خرب بسببها، وتبعت لها بنتها بتموين عشان تعايرها، وإنت واقف تتفرج وتقول لها انزلي اعتذري؟ هو إنت متجوز أختي عشان تحميها وتصونها، ولا عشان تجيبها خدامة وتهينها مع أهلك؟
أحمد احمرّ وشه، وبص في الأرض يا محمد أنا مكنتش عايز مشاكل تكبر بين الإخوات، كنت عايز الليلة تعدي وخلاص.
محمد رد عليه بحزم الليلة تعدي لما تكون المشكلة سوء تفاهم، لكن دي قلة أصل وقلة احترام لأختي ولأهلها اللي وراها! أختي مش مقطوعة من شجرة عشان تيجوا عليها كدة! الشنطة دي عار على اللي بعتها مش على اللي استلمها!
سلفتي حاولت تتكلم وتبرأ نفسها والله أنا مكنش قصدي أنا محمد قاطعها بنظرة حادة وبص لجوزها اللي كان لسه نازل على الصوت ومش فاهم حاجة مراتك يا أستاذ هي اللي بدأت الحكاية دي كلها، بكلامها الرخيص في المنور اللي خرب النفوس. واحدة زي دي ميتسكتش عليها، لأن الست اللي تبص لسلفتها بالشكل ده وتبعتر أسرار البيوت وتفتري وتقول عينيها حرقت البيت، دي ست نيتها مش صافية وعايزة تولع في البيت كله عشان ترتاح!
حمايا ضرب بعصايته في الأرض وقال بصوت عالي بس! اخرسوا كلكم! بص لسلفتي وقال بغضب إنتِ يا ولية، إيه اللي وداكي تبعتي تموين للبيت التاني؟ هو إبراهيم أخوكي كان مقصر في بيته عشان تتدخلي وتعملي الحركات دي؟ مين سمح لك تهيني مرات أخو جوزك؟ سلفتي نزلت راسها في الأرض وبدأت تعيط بجد المرة دي من الخوف ومن نظرة حماها.
حمايا كمل وبص لحماتي وإنتِ يا أم أحمد، من إمتى وإحنا بنربي عيالنا على كسر خاطر الناس؟ البت طلبت طبق أكل بحسن