الشاب محمود عيسى

اللي قدامك دا هيموت قريب أو هيحصله بتر بسبب كابتن جيم حقنه بمادة دمرته.
للأسف المادة دي لسه موجودة رغم إنها محرمة دوليًا وكباتن كتير معندهمش ضمير بيحقنوها للشباب الصغير وحياتهم بتنتهي.

لما كابتن الجيم يعرض عليك حاجة تاخدها، فكر مليون مرة في نفسك وخاف قبل ما تروح طريق مسدود نهايته سودا.

(محمود عيسى)، كان شاب رفيع وجسمه مش حلو، لما راح جيم الكابتن عرض عليك كورس حقن وهيخليه دبابة، وبيغريه بالأحلام بتاعة الجسم المثالي والفورمة الحلوة، وبيديله كورس لمدة 45 يوم.

(محمود) بيقول إنه مكنش يعرف إيه اللي بيدخل جسمه، ولما كان بيسأل الكابتن يقول له دي مادة خاصة بيا وإنتَ ليك النتيجة.
وفضل 45 يوم يحقن مادة مسمومة في جسمه.

بيقول إن الكابتن دا كان عامل زي صيدلية متنقلة بيديك منها كل اللي إنتَ عاوزه في السر، والجيم مكنش بيتباع فيه أي مكملات.

لما كان بياخد الحقن، دراعه كان بيحمر وبيلتهب، ولما كان بيسأل الكابتن كان بيقول له مفيهاش حاجة، خد حاجة مضادة للالتهاب، لحد ما وصل للشكل اللي قدامكم دا بعد 45 يوم.

الكارثة بقى يا صديقي إن (محمود) بيقول إن فيه ناس كتير زيه، وفيه منهم ناس ماتت.

كمان فيه ناس بتيجي تقول له إنتَ خدت المادة دي غلط، واحنا هناخدها صح، وناس بتسأله اسم المادة إيه علشان تاخدها، وجاردات شغالين كدا زيه وشبهه وماحدش بيتكلم علشان المادة دي ملهاش علاج أساسًا.

(محمود) سافر الصين علشان يتعالج مرتين على حسابه وبرضه معرفوش يعالجوه.

المصيبة بقى يا صديقي إن المادة دي ضغطت على أعصابه بشكل كبير جدًا، ومع الوقت هيحتاج بتر، أو هيموت زيه زي باقي الناس اللي خدوها، خصوصًا بعد سن الخمسين.

(محمود) عنده 42 سنة يعني اللي باقي مش كتير، ومتجوز وعنده 4 أولاد ومراته حامل في الخامس.

طيب ايه هي المادة دي؟؟
تعالى أقول لك.

المادة دي اسمها السينثول.
عبارة عن زيت بيتحقن في العضلة علشان يكبر شكلها من غير قوة، ومن غير صحة، ومن غير أي منطق.

السينثول بيعمل إيه؟
بيحبس الزيت جوه العضلة، يضغط على الأعصاب، يبوظ الأنسجة، يعمل التهابات، تليفات، خُراجات، ومع الوقت العضلة نفسها تموت.

المصيبة إن مفيش علاج حقيقي.
اللي اتدمر اتدمر.
يا جراحة يا بتر يا شلل، واللي محظوظ يعيش بعاهة.

والمصيبة إن فيه كباتن جيم عارفين كل دا، وبرضه بيبيعوا الوهم.
يقول لك: “متخافش، أنا عارف بعمل إيه”
وهو أصلًا حقن ناس قبل كدا وماتوا أو اتشلوا.

نصيحة، بالله عليك ما تضيع نفسك.
مفيش جسم يستاهل تخسر علشانه صحتك، أو عمرك.
العضلة اللي تيجي بالحقنة، بتروح بمشرط.
والمنظر دا مش متناسق ولا هو فورمة ولا عضل، ولو حد نفخ فيك هيوقعك لأنه عبارة عن ورم.

لو كابتن قال لك “خد حاجة”
ابحث عنها الأول واعرف هي إيه.
يا عم اسأل شات جي بي تي عنها، دا أسهل حاجة.

وخلي بالك..
مش كل اللي عضلاته كبيرة يبقى فاهم، فيه ناس حمير وبتضيع غيرها والله.

الكباتن اللي بتعمل كدا المفروض مكانها السجن، الكباتن اللي تسببوا في موت شباب صغير، أو بتر، بسبب مادة السينثول، المفروض يتعـ* ـدموا. لأن دا شروع في قتـ* ـل.
ارحمونا بقى من القرف دا ومتاخدش حاجة غير لما تبقى عارف هي إيه ومصدرها إيه.

وعوا الشباب وعرفوهم، ولو شوفت ابنك بياخد حاجة ابحث عنها بسرعة وشوف مضرة ولا لا.

وشكرًا.

#محمد_صاوي!¡